Ee laange Camp Volant geet zu Enn...

Gegrënnt goufe mir am Hierscht 1988, aus dem Parverband Housen-Houschent als Scouten "Mère Thérèse".

Zu Lëpschent, wou mer eis Ufanks zu engem stännege Grupp wollten entwécklen, hu mer eis awer och schonns erëm missen op de Wee maachen, fir een neit Ënnerdaach-Sinn ze fannen. Zu Eesbéch hu mer eis dunn erëm néier gelooss, wou mer nei Energie getankt hunn an nei Memberen opgeholl hunn. Laang sollte mer hei awer net bleiwen, well d'Rees huet eis op een neits mat gerappt. Nodeems de schwéiere Bierg aus dem Eesbécher-Dall op Housen erop gepackt war. Hu mer eis fir eng drëtt Kéier missen asetzen fir een Ënnerdaach ze kréien. Vill ze oft hu mer zu Housen missen hin an hier wanderen, wat eis awer net dovunner ofgehal huet ee méi grousse Grupp ze ginn.

Eng läschte Kéier sollt et dunn erëm op den Hike goen. Kuerz virun eiser bal 25-järeger Rees, koum et den 13. Abrëll 2013 endlech zum Entschloss, dass mer eise Camp Volant erfollegräich am Parc Housen dierften ofschléissen.

Op eiser laanger Rees hu mer vill gesinn, vill mat gemaach an vill geléiert. All déi Momenter déi laanscht eis gezu sinn, hunn eis zu deem gemaach wat mer haut sinn.

An zur haiteger Zäit, Owes beim Lagerfeier, wann mer Lidder sangen an eis Geschichten iwwert d'vergaangen Zäiten erzielen, wiisst eis Freed an eise Stolz, wann mer zréck denken, wéi vill Steng mer aus dem Wee geraumt hunn an wat fir ee schwéieren Hike mer hannert eis hunn.

Trotz Héichten an Déiften sinn mer gutt an eisem Chalet ukomm.

Op dëser Plaz soe mer nach eemol ee grousse Merci un déi 4 Gemengen, an dem Parverband fir d’Ënnerstëtzung an all deene Joeren. Mer soen awer och dem SISPOLO, der Madame Marie Josée Jacobs an och dem Här Marco Schank Merci fir eist neit Doheem am Parc Housen. 

• Foto'en vun der Aweiung
• Artikel op MyWort.lu

Eise Grupp...

...ee Stéckelche Geschicht

Gegrënnt goufe mir am Hierscht 1988 ënnert dem Numm "Scouten Mère Thérèse Housen-Houschent". Am September 1989 hate mir eis éischt Versammlung zu Lëpschent. Vill Weekender, Campen a Versammlungen goufen organiséiert, woubäi mir och während ville Joeren Theater gespillt hunn. Am Joer 1996, wéi d'Guiden a Scouten fusionéiert hunn, sinn och aus den "Scouten Mère Thérèse Housen-Houschent" d'"Lëtzebuerger Guiden a Scouten Mère Thérèse Housen-Houschent" ginn.

Well mir am Laf vun eiser Geschicht keng eege Raimlechkeeten haten, si mir vu Lëpschent fort no Eesbéch gezunn, a vun do op Housen, wou mer dunn vu Sall zu Sall gezu sinn. Am Fréijoer 2013 war et endlech esou wäit, eise Chalet am Parc Housen gouf ageweit, a mer konnten eis laangjäreg Rees endlech ofschléissen.

Am Fréijoer 2015, huet eise Grupp seng 25 Joer gefeiert. Zesumme mat eiser 25 Joer Feier däerfte mer och een neie Fändel deefen, op deem de Schrëftzuch "Grupp Mère Thérèse aus dem Parc Housen" ze liesen ass. Et gëtt ëmmer gesot: gutt Gewunnechte soll een sech net of winnen, an dofir hu mer näischt dogéint dobaussen weiderhin, - trotz eisem neien offiziellen Numm, mam Numm "HouHou" begréisst ze ginn.

Eise Grupp zielt zur haiteger Zäit knapp 60 Memberen, hei drënner ziele mer d‘Chef'en, d'Mataarbechter, Jongen a Meedercher vu verschiddenen Altersgruppen.

Bei Froen...

Hutt dir nach Froen? - Dann kontaktéiert eis ganz einfach.

Kontakt